Житие преподобного Елеазара Анзерского, Соловецкого Чудотворца, написанное им самим

E-mail Печать PDF

Житие Преподобного Елеазара Анзерского, написанное им самим. 1614-1615 г.Лета 1615 года. Поведа мне, грешному Елеазару, некто от христолюбивых мужей о острове Анзерском — возможно на нем имети житие пустынное. И приидох, нача здати келлиа. Завидя же супостат диавол, хотя устрашити и изгнати, вооружися на мя со многими бесы, ови во образ знаемых Сумских людей стрельцов... ови на конях, ины же пеши с луки, и с самопалы, и с копии. Обступиша мя с яростию хотяху убита, глаголюще сице: «Почто прииде на нас? Наше бо место исконии бе, никто же бо житие прежде тебе имуще». Аз им отвещав: «Не ваше — Христа Бога нашего, а Бог изволил быти мне на месте сем».

И начах глаголати: «Да воскреснет Бог и разыдутся врази Его» — и протчая псалма того. И тако отъидоша без вести... Иногда же <внезапу> пришедше, яко из тысячи вдруг самопалов удариша, с первых днех жития моего, от Покрова Пресвятей Богородицы до Рождества Христова, Бога нашего. Зело мне тяжко — не дающе сна и покоя ни в день, ни в нощь. И не в кое время, спяще и не спяще мне, прииде ко мне в видении Святая Богородице, глаголюще ми тако: «Мужайся и крепися, Господь с тобою. И напиши в келлии своей на стенах: “Христос с нами уставися”». И даде мне посох и четки. Аз же, востах, написах по глаголу Ея. И умалися многи рати. По сем седящу ми некогда, борящеся со сном и слышах глас, поюще псалом на 4-й глас: «Вознесу Тя, Господи Боже мой, яко подъял мя и не возвеселил еси враги моя, Господи Боже мой!» Аз же... воспех в той же глас: «Буди имя Господне благословенно отныне и до века». По сем облецыся во святый совершенный великий образ иноческий, и паче рать умалишася... И невозможно многих козней их изглаголати и списати.

Во ины же дни прииде ко мне некто Соловецкаго острова инок, имя ему Кирило. И нача ему глаголати: «Брате, аще пришел еси Богу работати — поживем в любви Христовой в безмолвии обычаем. Церкви же отнюд не помышляй ставити, освятим прежде церковь телесную, свободим душы своя от грех, а по смерти нашей, яже Бог изволит». Он, слыша от мене, и паче мене, укрепляюще, и обещася никако же сего начаты... Но Сам Бог изволи быти святой церкви... извести... Святейшему патриарху о святем месте... и приложи велию веру строити. Некогда же видех аз, грешный Елеазар, умныма очима над тем местом, идеже ныне стоит святая церковь, облак темен, и нача быти красен, и сниде, нача гремети, обхожаше около то место, попаляя и очищая остров, идеже церковь и келлии ныне стоят... Ин же брат поведа мне, имя ему Феофил: видяще идуще от высоты небесныя, от Востока, церковь на место богоизбранное. Старец мой Фирс слышах яве звон велми и мене возва из келлии во свидетельство се бывающи. Лука же верижник, что был у губы у Троицкой, слышах во дни глас неизреченный и звон мног на том же месте: в то время брал ягоды на монастырь Соловецкой. И мнози людие поморцы, егда стояще у острова ко пристанищем, поведаху мне страшная и различная знамения.

Святой антиминс из церкви Свято-Троицкого Анзерского скита. Освящен 18 ноября 1646 г.По повелению Государя Царя и Великаго Князя Михаила Феодоровича всея Русии и по благословению великаго государя, Святейшаго патриарха Филарета Никитича, Московскаго и всея Русии, поставити повеле церковь во имя Пресвятыя Троицы. Егда же уготова бревна, прииде игумен Иринарх обложити церковь и нача класти основание бревны, идеже ныне стоит. Аз же моляще его подвигнути основание повыше, чтоб среди острова. Он же не послуша... поведа мне: «Сын-де мой духовной, инок, сидел на тони, со служебники ловил рыбу красну на Соловецкой монастырь... от того места за две версты. И поведа мне страшно видение: во время полудня седящу ему стрегуще рыбы и видех на том месте столп огнен, до небес восходящ. Он же вскоре посла двух человек своих рыболовцов: "Идете и возвестите ми, что се есть таково дивное знамение?" Онии же приидоша на место то, огня же не видяще, токмо от того места восходяще дым и гарь»... Во оно же время, при игумене Рафаиле видяще в нощи иноцы и бельцы Соловецкаго монастыря над монастырем Анзерским свет неизреченный. Они же мняще, яко церковь и вси келлии от огня погореша. И в той же нощи игумен посла двух человек на проведание. Они же приидоша скоро ко мне и вопрошающе мя и братию: «Что у вас в нощи сей бывше?» Нам же отвещающе: «Ничто же видехом, токмо милостию Божией хранимы». Прежде мене, грешнаго Елеазара, бывшей игумен Иаков виде от Бога откровение о месте Анзерском... И поведа, что хощет Бог прославитися на месте сем, и будет монастырь велий и многи святыя. И сам он хотел поставити монастырь на том месте и церковь воздвигнута. И по зависти супостата врага не даша ему воздвигнути Соловецкия старцы. Он же и до смерти глаголаще: «Аще и не даша мне поставити, а обитель будет на месте сем велия».

Во ино же время стоящу ми пред образом Христа, Бога нашего, молящеся со слезами и глаголюще тако: «О Владыко Христе, Царю и Содетелю мой, что воздам против милости Твоей? И ничто же бо благо сотворих пред Тобою!» И видех, яко голубь лицу моему тихо приразися и глаголюще тако: «Богу моему и Богу твоему слезы твоя принесу». И тако невидим бысть. И возрадовася душа моя, и вся внутренная в веселии бысть... Во ино же время мало приимшу мне сна лежаще на ложи моем, имуще во устах молитву, и обретохся на некоем месте при горе, недалече от церкви к восточной стороне с полпоприща. И видех умныма очима чудное видение: седяще на престоле Господа Бога ветхи денми, яко же описуют иконописцы, с Ним же видяще на престоле Сына Божия, на третием престоле Святаго Духа в голубине образе. Чуднаго же зрака их и сияния невозможно списати. Пред ними же стояще ангелы, имуще на себе одежду белу, яко снег, держаще в руку своею кадило, и нача кадити, яко же священники обычай имать по чину, по трижды. И нача кадити прежде Отца и Бога, глаголюще тако: «Слава Отцу и Сыну и Святому Духу», — и поклоняшеся до земли. Прииде же к Сыну Божию, нача кадить, глаголюще сице: «Славословлю Тя, Сына, со Отцем и Духом Святым», — и поклоняшеся. Прииде же ко Святому Духу кадить, глаголюще: «Прославляю Тя, Святаго Духа, со Отцем и Сыном». Аз же грешный приложих к сим словесем: «Троица Святая, спаси души наша ныне и во веки веков, аминь». И ощути сердце мое исполнено радости многи зело...

И по многим временем многим сим знамением не верующе ми, да некако прельщен буду от врага. И седящу ми в келлии при оконце и слышах глас от полуденныя страны, яко гром от небеси, истязающе мя за неверие многим видениям... «О роде неверный и развращенный, доколе буду с вами, доколе терплю вам?!» И от гласа того страшнаго ужасеся душа моя и вострепета вся внутренняя моя зело. Не в кое же время хотяще ми изыти от острова Анзерскаго в руския места от стужения злых человек и бесовских страстей, и видех знамение. Стоящу ми на поле чисте и показующе ми некто незнаем перстом на небо: «Зри». И видех чрез все небо лучу световидну, яко радуга во время дождевное. И, мало помедлив, паки глаголюще: «Возри на небо». И видех образ Христа Бога нашего, и Пречистую Богородицу, и святаго пророка Иоанна, с ними же дву ангелов и апостолов, яко же в Деисусе описуются. Мне же чудящеся сим знамениям. И паки показующе ми: «Зри на небо!» И видех нерукотворенный образ Христа Бога, тако бысть велик во все небо. И глаголаше ми: «Виждь величество Божие и славу Его: егда Отчим изволением во чреве вместися в Пресвятую Богородицу и на земли многи скорби претерпев человек вас ради быв, ныне же и небо не вместит. А ты не хощеши терпети скорби».

Некогда ми бдяще в молитвах и совершающе Иисусовы молитвы, число и поклоны. Последи же нача призывати Пречистую Богородицу. Обычай имущи молитися: «Пресвятая Госпоже Мария, Пречистая Богородица, спаси мя, грешнаго!» И к совершению сотни сотвори, является мне Пресвятая Богородица, имуще на Себе три звезды вельми светлы — на главе и на рамех, яко же описуют, имуще ризу багровидну. И глаголаше ми: «Елеазар, разумей на Мне звезды сия. И аще имаши всегда Мя тако призывати в молитвах, буду тебе помогати до исхода души твоея»...

В день недельный, во святый пост, видех Святую Богородицу на Литургии умным оком, стояща пред образом Своим большим от леваго крылоса лицем на церковь. И нача мы на сходе пети оба крылоса стих: «О Тебе радуется, обрадованная» задостойна. Она же двигнуся с того места и ста посреде нас с молчанием, стояла до скончания стиха того. Мы же, пропевше, поклонишася по обычаю, Она же тако же поклонися и невидима бысть. Мне же страхом и радостию объяту бывшу. Во ино же время летнее приидох в церковь к обедни в день суботный поранее, прежде братии, и в трапезе начало положих по обычаю. И является мне образ Пречистыя Богородицы подобие Смоленския, держаще на руку левою Превечнаго Младенца, Господа нашего Иисуса Христа, яко же в Соловецком монастыре против игуменскаго места, имуще на Себе ризу багровидну, златом часто испещренну. И глагола ми тако: «Елеазар, имейте заповеди Христовы — смирение и любовь, да во имя Мое поставите святую церковь». И невидима бысть.

Некогда ми прииде помышление: како сотворю угодно Творцу и Богу моему и что угодно Ему моление? И востах помолихся прилежно: «Владыко, Боже Отче и Сыне и Святый Душе! Яви мне, како Тя призову на всяко время — псалмопением или красною молитвою?» И слышах глас глаголющ ко мне: «Сим образом молися — глаголи на всяк день: "Слава в вышних Богу и на земли мир, в человецех благоволение" — до конца, и: "Господи прибежище бысть нам", и: "Сподоби, Господи, в день сей и на другой день"». Паки помолихся. И паки тоже повелевает глаголати. Се бо есть песнь к Богу обща ангельска и человеческа. Аминь.

Свято-Троицкий храм Анзерского скита. Литография 1881 г.